教學日常 四手聯彈

現今香港小朋友既音樂學習風氣都偏向考級成績，常多只集中係考試曲既練習方面，永遠都好似只係自己彈俾自己聽咁，除左老師講「哩到彈得好、哩到可以／需要點樣改善」之外，學生好多時其實真係唔識自己去分別咩為止好／唔好，而自己想去追求既聲音又係點樣。

襯今次音樂會，學生們可以同其他人交流同分享自己既練習成果之外，MISSHO 私心非常希望學生有演奏四手聯彈既機會。

其實平時課堂上既時間，由初學既學生開始，MISS HO都會安排四手聯彈既課程，對於初學既學生黎講，四手聯彈可以幫到學生去培養拍子感之餘，同時令課堂既氣氛變得更歡樂，學生更投入，更主動想去做齊樂譜上所有記號/ 情感，更有想將樂曲演奏得更完美既心態。

今次既音樂會，係學生與學生之間既四手聯彈，每首樂曲安排兩位差唔多水平既學生去做演奏，大家對於係技術、聽力、表現力既提升都有極大幫助，同時亦係同自己以外既音樂人一個好好既交流時刻。

可以有交流既機會真係非常珍貴，而MISSHO 亦都想話俾學生知，學習鋼琴既路上並不孤獨。