💝2023年末回顧

2023年係收穫超級豐富既一年。

首先，由咁多年既家中教學，到今年年初搬出黎工作室開設 J HO PIANO STUDIO 係一個最大既轉變。

好多家長都問我，係家中教學唔係應該最舒適？點解仲要花租金加重成本另外租一個地方？因為，係我心目中既學音樂，唔單單止淨係學習樂譜上面既事情。

由第一年剛剛開始係外面既琴行做導師開始，我都已經會舉辦大大小小既演奏日俾學生去參與，我好希望而家既小朋友唔係淨係為左去考取一張證書而學習音樂。好希望可以係演奏日之中俾個機會學生去結識音樂路上既伙伴，亦知道原來彈琴唔係淨係自己一個係屋企對住部琴咁悶既事。我地仲可以藉著演奏會去分享自己努力練習成果個份喜悅同成功感。所以一有搬出黎工作室既想法時，我就已經向住自己既工作室都可以舉辦到演奏會哩件事情去進行。

第二個大轉變就係，疫情 終於都緩和，好多音樂比賽都終於有番現場實體賽事喇！比起而家既錄影式考試，我更加推薦學生多參加實體比賽。每一次既比賽都可以令學生係各方面躍進超大步！而今年既收穫都非常理想，期待各位學生來黎繼續進步。